موقف حصل معايا
الموقف دة حصلي من زمان بس حسيت أنه مكانه يتحط هنا...
مرة في المسجد رن تليفون أحد المصلين أثناء الصلاة... قعد يرن مدة طويلة
وأول ما الصلاة خلصت انتشرت الهمهمة في المسجد وبدأ الناس يعلون من أصواتهم
بالكلام من سبيل: "والله الصلاة ضاعت عليا" - "يا جدع حرام عليك" - " دا
مجاش في باله حتى يقفل التليفون". وصوت الناس في هذا الوقت كان أعلى من صوت
تليفون الراجل لدرجة إنه كان يضايق الناس الي بتكمل صلاتها (يعني الناس الي
دخلوا الصلاة متأخرين) أكتر مما كان تليفون الراجل دة "بيشوشر عليهم" وهم
بيصلوا. وأنا ببص على إمام المسجد أو الشيخ كنت منتظر أنه يوقف الفتنة دي
في حين إن الراجل صاحب التليفون مكنش بيتكلم وشكله مكنش عارف يوقف صوت
التليفون لأنه كان لسه بيرن. كنت مستني الشيخ يقول: (( يا جماعة في قصة
سمعتها قبل كدا بتقول ان كان في واحد تليفونه رن في وسط الصلاة والناس قعدت
تزعقله وكسفته فمبقاش يجي المسجد تاني.. فطلع عالقهوة فاتكعبل ووقع رف
كوبايات ازاز و اطباق اتكسرت كلها الراجل صاحب القهوة قاله يا باشا ولا
يهمك دا مكانك تنور فالراجل بقى قاعد عالقهوة دي على طول. يا جماعة ربنا
خلق الإنسان نسّاي يعني كثير النسيان وكثير الخطأ ودي حكمة ربنا -سبحانه
وتعالى- النبي ﷺ قال: {لو لم تذنبوا لذهب الله بكم وجاء بقوم يذنبون
فيستغفرون فيغفر لهم} فمش هنقعد احنا نحاسب بعض وندايق الراجل بكلام مش
هيغير الي حصل ولا هيفيد بحاجة. يا راجل دا الكلمة الطيبة صدقة لو كنتوا
رحتوا للراجل قولتوله احنا عايزين نعلق يافطة برا على باب المسجد عشان
الناس الي بتنسى تعمل تليفونها صامت كان هيتأسف ويفهم ويقول أنا متأسف يا
جماعة إني سببتلكوا ازعاج أثناء الصلاة إن شاء الله صلاتنا مقبولة)) بس
الإمام معملش كدا ومخدش باله إن أنا فضلت باصص عليه مستنيه يقول حاجة.
حاجات تانية ممكن تعجبك
Comments
Post a Comment